’पत्रकारले साउनबाटै न्यूनतम पारिश्रमिक पाउँछन्’ : सूचना तथा सञ्चारमन्त्री राई

sherdhan raiकाठमाण्डौ । सूचना तथा सञ्चारमन्त्री शेरधन राईले श्रमजीवि पत्रकारका लागि तोकिएको न्यूनतम पारिश्रमिक साउन १ गतेदेखि लागू हुने बताएका छन् ।

सञ्चार प्रतिष्ठानमा कार्यरत पत्रकारका लागि र १९ हजार ५००, कर्मचारी÷कामदारका लागि रु १४ हजार ४००, अन्य सञ्चार प्रतिष्ठानमा कार्यरत पत्रकारका लागि १४ हजार १०० र कर्मचारी÷कामदारका लागि १२ हजार ५०० तलब तोकेर यही वैशाख २३ गते मन्त्रिपरिषद्ले गरेको निर्णयबाट सरकार पछि नहट्ने स्पष्ट पारे ।

पछिल्लोपटक न्यूनतम पारिश्रमिक निर्धारण समितिले २०७२ असारमा दिएको सुझावका आधारमा झन्डै १० महिनापछि २०७३ वैशाख २३ गतेको मन्त्रिपरिषद्ले साउन १ गतेदेखि लागू हुने गरी निर्णय गरेको थियो ।

न्यूनतम पारिश्रमिक निर्धारण समितिद्वारा यहाँ आज आयोजित ’मिडियामा न्यूनतम पारिश्रमिक कार्यान्वयन’ विषयक अन्तक्र्रियामा सरकारका प्रवक्तासमेत रहनुभएका मन्त्री राईले भने, ’पत्रकारको न्यूनतम पारिश्रमिक लागू हुन्छ, त्यसका लागि मिडिया सञ्चालकले राखेका ११ बुँदे मागका बारेमा समेत छलफल हुँदैछ ।’

मन्त्री राईले मन्त्रिपरिषद्ले गरेको न्यूनतम पारिश्रमिकसम्बन्धी निर्णय साना लगानीका मिडिया बन्द गर्ने नभई समग्र पत्रकारको पेसागत सुरक्षाका लागि गरिएको समेत स्पष्ट पारे ।
उनले अनावश्यक टीकाटिप्पणी गर्नेभन्दा पनि न्यूनतम पारिश्रमिक कार्यान्वयनतर्फ सहयोग गर्न मिडिया सञ्चालक, पत्रकार तथा सबै सरोकारवालासँग अपिल गरे ।
नेपाल पत्रकार महासंघका अध्यक्ष डा. महेन्द्र विष्टले मिडियालाई सरकारले दिने अन्य सुविधामा वृद्धि गरेर भए पनि ती सबै मिडियामा न्यूनतम पारिश्रमिक लागू गर्नुपर्नेमा जोड दिए ।
’हरेक परिवर्तनका मुद्दालाई संस्थागत गर्न भूमिका निर्वाह गर्ने, आवाजविहीनको आवाज उजागर गर्ने पत्रकारको भौतिक र आर्थिक सुरक्षाको सुनिश्चित गरिनुपर्छ’ अध्यक्ष विष्टले भने । यदि कार्यान्वयन नभएको खण्डमा महासंघ संघर्ष गर्न पनि पछि नपर्ने उनको भनाई छ ।

प्रतिक्रिया दिनुहोस्: