कनकाई भेट्रान्स कपः हाम्रो इटहरी फाइनल प्रवेश

मेचीखवर अनलाइन । सुरुङ्गा
सुनसरीको हाम्रो इटहरी भेट्रान्स क्लब झापाको सुरुङ्गामा जारी कनकाई भेट्रान्स कप फुटबल प्रतियोगिताको फाइनल प्रवेश गरेको छ ।बिहीबार भएको दोस्रो सेमिफाइनल खेलमा झापाको दुधे भेट्रान्स क्लबलाई १–० गोल अन्तरले हराउँदै हाम्रो इटहरीले फाइनलमा स्थान पक्का बनाएको हो ।

खेलको पहिलो हाफमा हाम्रो इटहरीले गरेको एक गोल नै जितका लागि काफी भयो । खेलको २१ औँ मिनेटमा हाम्रो इटहरीका डेनिम राईले उत्कृष्ट गोल गर्दै पाहुना टोलीलाई अग्रता दिलाएका थिए । राईको करिब २५ यार्ड लामो फ्रिकिक प्रहारले सोझै जाली चुमेको थियो ।
यसअघि १५ औँ मिनेटमा हाम्रो इटहरीका जोनी तामाङको प्रहार गोलबार छेउबाट बाहिरिएको थियो ।

त्यस्तै, खेलको तेस्रो मिनेटमा दुधेका भीष्मप्रसाद खरेलको प्रहार गोलरक्षकले बचाएका थिए । प्रेम घिमिरेले सेन्टर लाइनभन्दा पछाडिबाट दिएको पास खरेलले हाम्रो इटहरीको रक्षापंक्ति बिट भएको मौकामा एक्लै गोल लिएर अघि बढेका थिए । तर, उनको प्रहार फितलो हुँदा गोलमा परिणत हुन सकेन ।

त्यस्तै, छैटौँ मिनेटमा प्रेम घिमिरेको प्रहार हाम्रो इटहरीका गोल रक्षकको हातबाट फुस्किएपछि गरेको प्रहार गोल हुन सकेन । खेल मैदान हिलाम्मे भएका कारण खेलाडीले गोल नियन्त्रण लिन सकेका थिएनन् ।आजको खेलको म्यान अफ द म्याच हाम्रो इटहरीका रामशरण चौधरी घोषित भए । उनलाई ढुवानी व्यवसायी तथा फुटबलप्रेमी श्याम प्रसाईंले नगद दुई हजार रुपैयाँ प्रदान गरे ।

शनिबार हुने फाइनल खेलमा हाम्रो इटहरीले आयोजक कनकाई भेट्रान्स क्लबको सामना गर्नेछ । कनकाई भेट्रान्स क्लबको आयोजनामा कनकाई माविको खेल मैदानमा भएको प्रतियोगितामा ८ वटा टिम सहभागी छन् । प्रतियोगिताको विजेताले नगद १ लाख १ हजार पाउँदा उपविजेताले नगद ६१ हजार र ट्रफी पाउनेछ ।

प्रतिक्रिया दिनुहोस्: