बिर्तामोड । सहिद प्रजापति स्मृति प्रतिष्ठानले फागुन २१ गते गोलधापमा आयोजना गर्न लागेको बृहत् जनवादी गीति कार्यक्रमको तयारी पुरा भएको छ ।
प्रतिष्ठानले शनिबार कार्यक्रमस्थलमा पत्रकार सम्मेलन गरेर तपारी पुरा भएको जनाएको छ । बरिष्ठ जनवादी गायक राजन राईको उपस्थितिमा सांगितिक कार्यक्रम सञ्चालन गर्ने तयारी भएको आयोजक समितिका अध्यक्ष त्रिलोचन सापकोटाले जानकारी दिए ।
बामपन्थी पृष्ठभूमिका प्रजापति सापकोटालाई २०४३ सालको तिहारमा जनवादी देउसी भैलो खेल्ने क्रममा पञ्चायती व्यबस्थाका समर्थकले हत्या गरेका थिए । उनकै स्मृतिमा प्रतिष्ठान स्थापना गरेर जनवादी सांगीतिक आयोजना गरिएको हो ।
अध्यक्ष सापकोटाले प्रचार प्रसारलाई व्यापक बनाएको जानकारी दिए । उनले कार्यक्रममा १० हजार भन्दा बढी दर्शस्रोता उपस्थित हुने अपेक्षा गरिएको बताए । गणतन्त्र बिरोधी गतिविधि बढ्दै गएको समयमा यो व्यवस्था स्थापनाका लागि ज्यानको आहुति दिएका सापकोटाको योगदानलाई अझ व्यापक बनाउन कार्यक्रम आयोजना गरिएको उनले बताए । सोही समयमा रक्तदान कार्यक्रम समेत आयोजना गरिएको उनले बताए ।
नेकपा एमालेका सचिव योगेश भटराईको प्रमुख आतिथ्यतामा हुने कार्गक्रममा नेकपा माओवादी केन्द्रका केन्द्रीय सदस्य रञ्जित तामाङ, एकिकृत नेकपा समाजवादीका केन्द्रीय सदस्य पुष्प पोखरेल लगायतका बनमपन्थी नेताहरुको सहभागीता रहने छ ।
जनवादी संस्कृतिलाई जनसाधारणले बिर्सिन लागेको अनुभूति भएकाले कार्यक्रम आयोजना गरिएको संस्थाका सहसचिव अनिल सापकोटाले बताए । उनले कार्यक्रम सम्पन्न गर्न ६ लाख रुपैया खर्च हुने अनुमान गरिएको बताए । निशुल्क प्रवेशको व्यवस्था गरिएको कार्यक्रममा स्वेच्छिक रुपमा आर्थिक सहयोग गर्न सकिने छ ।
'शिरैमा मेरो, शिरैको टोपी, 'कान थापेर सुनिदेउ दाजु' लगायतका कालजयी जनवादी गितका सर्जक राई हुन् । स्थानीय कलाकारहरु अनिल सापकोटा, गोपाल योङहाङ, मेदनी शिवाकोटी, अम्बिका अधिकारीले पनि सांगीतिक प्रस्तुति राख्ने बताईएको छ ।
कार्यक्रमको पुर्वसन्ध्यामा गोलधाप बजार सरसफाई पनि गरिएको थियो ।
