अर्जुनधारा । झापाको अर्जुनधारामा आगामी मंसिर ९ गते महिला तथा पुरुष खुला हाफ म्याराथन प्रतियोगिता आयोजना हुने भएको छ। सन्तलाल वृजमोहन गट्टानी स्मृति प्रतिष्ठानको आयोजनामा २१ किलोमिटर दूरीको दौड प्रतियोगिता हुन लागेको हो।
लागूऔषध दुर्व्यसन न्यूनीकरण तथा अर्जुनधारा जलेश्वर धाममा आयोजना हुन लागेको ४४औँ अनुष्ठानको प्रचारप्रसार र प्रवर्द्धन गर्ने उद्देश्यले प्रतियोगिता आयोजना गर्न लागिएको आयोजक समितिका संयाेजक मिलन बस्नेतले जानकारी दिए ।
प्रतियोगितामा महिला तथा पुरुष दुवैतर्फका खुला धावकले सहभागिता जनाउन सक्नेछन्। प्रतियाेगितामा महिला र पुरुषकाे समान पुरस्कार राशी राखिएकाे बस्नेतले जानकारी दिए । प्रतियोगितामा प्रथम हुनेले १ लाख १ हजार १ रुपैयाँ, दोस्रो हुनेले ७५ हजार १ रुपैयाँ र तेस्रो हुनेले ५१ हजार १ रुपैयाँ पुरस्कार प्राप्त गर्नेछन्। त्यसैगरी चौथोदेखि दसौँ स्थानसम्म हासिल गर्ने प्रत्येक धावकलाई १० हजार रुपैयाँ प्रदान गरिनेछ।
प्रतियोगितामा सहभागी सबै धावकलाई प्रमाणपत्र र टी–सर्ट उपलब्ध गराइने आयोजकले जनाएको छ। प्रतियोगितामा सहभागी हुन ३०० रुपैयाँ प्रवेश शुल्क निर्धारण गरिएको छ।
अर्जुनधाराबाट सुरु हुने दौड खरबन्दी, बुद्धचोक, कालिस्थान, धाइजनचोक, बुधबारे, जयपुर, झम्केचोक र नारायणचोक हुँदै पिपलचोकमा पुगेर समापन हुनेछ। उनीहरुलाई जलेश्वर धाम परिसरमा एक समाराेहकाे आयाेजना गरेर पुस्कार प्रदान गरिने जनाइएकाे छ ।
खेलकुदमार्फत युवालाई स्वस्थ जीवनशैलीतर्फ प्रेरित गर्दै लागूऔषध दुर्व्यसनविरुद्ध जनचेतना फैलाउने र धार्मिक तथा सांस्कृतिक महत्व बोकेको अर्जुनधारा जलेश्वर धामको अनुष्ठानलाई व्यापक प्रचारप्रसार गर्ने प्रतियोगिताको मुख्य उद्देश्य रहेको छ।
_1723781421.gif)
