झापा । कुनै समय सामान्य ज्वरो, प्रसूति वा शल्यक्रियाका लागि पनि झापाका बिरामीहरू विराटनगर, धरान वा काठमाडौं धाउन बाध्य हुन्थे। समय, पैसा र पीडाको दोहोरो भार बोकेर उपचार खोज्ने बाध्यता धेरैका लागि सामान्य थियो। तर आज परिस्थिति फेरिएको छ। झापामै अत्याधुनिक प्रविधि, विशेषज्ञ चिकित्सक र गुणस्तरीय उपचार सहज रूपमा उपलब्ध हुन थालेको छ। यही परिवर्तनको एउटा सशक्त उदाहरण बनेको छ—कनकाई अस्पताल।

स्थापनाको २० वर्ष पूरा गर्दै २१औँ वर्षमा प्रवेश गरेको कनकाई अस्पतालले सेवा विस्तारसँगै सातै दिन  ओपीडी सेवा सञ्चालनमा ल्याउने घोषणा गरेको छ। यो निर्णयले हजारौँ सेवाग्राहीलाई थप सहज स्वास्थ्य सेवा उपलब्ध गराउने अपेक्षा गरिएको छ।

२०६१ सालमा २० शय्याबाट सुरु भएको कनकाई अस्पताल आज पूर्वी नेपालकै विश्वासिलो निजी स्वास्थ्य संस्थाका रूपमा स्थापित भएको छ। आधुनिक प्रविधि, अनुभवी चिकित्सक र बिरामीमैत्री सेवाका कारण अस्पतालले लाखौँ नागरिकको विश्वास जितेको छ।

दुई दशकको यात्रामा अस्पतालले केवल भवन वा सेवा विस्तार मात्र गरेको छैन, स्वास्थ्य क्षेत्रमा जनविश्वासको बलियो आधार पनि निर्माण गरेको छ।

अस्पतालले सार्वजनिक गरेको तथ्याङ्क आफैँमा यसको सेवाको दायरा र प्रभावको प्रमाण हो।

३ करोड ६५ लाख ६६ हजार ६३० पटक ओपीडी सेवा, ३ करोड ७४ लाख ४४ हजार ४५० भन्दा बढी प्रयोगशाला परीक्षण, २ लाख ८५ हजार ४४५ आकस्मिक सेवा, ३ लाख ३ हजार २४६ फिजियोथेरापी सेवा ५१ हजार १११ मेजर शल्यक्रिया, ५५ हजार ५६७ माइनर शल्यक्रिया, ३२ हजार  ९७९ बिरामी भर्ना सेवा र २४ हजार ५९८ सुरक्षित प्रसूति सेवा उपलब्ध गराएको छ ।

यी तथ्याङ्कले कनकाई अस्पताल केवल उपचार गर्ने संस्था मात्र नभई हजारौँ परिवारको जीवनसँग प्रत्यक्ष जोडिएको स्वास्थ्य केन्द्र बनेको पुष्टि गर्छ।

अस्पतालले बिरामीलाई सहजता प्रदान गर्न लिफ्ट सेवा सञ्चालनमा ल्याएको छ। साथै, भूकम्प प्रतिरोधी अत्याधुनिक नयाँ अस्पताल भवन निर्माण अन्तिम चरणमा पुगेको जनाएको छ। नयाँ भवन सञ्चालनमा आएपछि सेवा अझ प्रभावकारी र आधुनिक बन्ने विश्वास गरिएको छ।

विशेषज्ञ चिकित्सक थप्दै उपचार सेवाको दायरा विस्तार गर्नुका साथै अस्पतालले गुणस्तरीय स्वास्थ्य सेवालाई प्राथमिकतामा राखेको जनाएको छ। अस्पताल सञ्चालक समितिका अध्यक्ष युवराज डाँगीले बताउनुभयो।

यसअघि आइतबारदेखि शुक्रबारसम्म सीमित रहेको  ओपीडी सेवा अब सातै दिन सञ्चालन हुने भएको छ।

स्वास्थ्य क्षेत्रमा प्रतिस्पर्धा बढिरहेका बेला कनकाई अस्पतालले सेवा, प्रविधि र मानवीय संवेदनालाई सँगसँगै अघि बढाएको दाबी गरेको छ। अस्पताल व्यवस्थापनका अनुसार आगामी दिनमा अझ आधुनिक उपकरण, थप विशेषज्ञ सेवा र अन्तर्राष्ट्रियस्तरको स्वास्थ्य सेवा उपलब्ध गराउने योजना रहेको छ।

२० वर्षको अनुभव, करोडौँ सेवाग्राहीको विश्वास र निरन्तर सेवा विस्तारको यात्रासँगै कनकाई अस्पताल २१औँ वर्षमा प्रवेश गरेको छ। यो केवल एउटा अस्पतालको वार्षिकोत्सव होइन, झापाको स्वास्थ्य सेवाले हासिल गरेको एउटा महत्वपूर्ण उपलब्धि पनि हो।